Orcollo at Aranas sa 4th round

MANILA, Philippines — Tuloy ang mainit na ratsada nina Dennis Orcollo at James Aranas nang payukuin ang kanilang mga karibal para umabante sa fourth round ng prestihiyosong 2019 World Pool Series Predator Grand Final na ginaganap sa Steinway Café-Billiards sa Astoria, New York.

Naging armas ni Or­collo ang malalim ni­yang karanasan para ita­kas ang 11-9 panalo la­ban kay Mike Dechaine ng US, habang gi­nulantang ni Aranas si dating world champion Darren Appleton ng Great Britain sa pama­ma­gitan ng impresibong 11-4 demolisyon.

Target ni Orcollo na makahirit ng tiket sa quar­terfinals sa pakiki­pagtipan kay Mieszko For­tunski ng Poland na dumaan sa butas ng karayom sa losers’ bracket para makabalik sa kontensyon.

Hangad din ni Aranas na makakuha ng puwesto sa Round-of-8 sa pagsagupa kay Petri Mak­konen ng Finland na nanggaling din sa lo­sers’ column.

Una nang tinalo ni Ara­nas si Makkonen sa second round noong Biyernes sa iskor na 11-7.

Tuluyan namang na­maalam sa torneo si­na 2017 World 9-Ball champion Carlo Biado, Daniel Dagotdot at Mhet Vergara matapos yu­mu­ko sa kani-kanilang do-or-die games sa losers’ bracket.

Naitala muna ni Bia­do ang 11-6 panalo laban kay Elvis Rodriguez ng Honduras sa unang pagsalang sa one-loss side bago lumasap ng di­kit na 10-11 kabiguan sa kamay ni Makkonen.

Bigo din si Dagotdot kay Joey Korsiak, 2-11, gayundin si Vergara kay Matt Krah, 7-11.