Paul George nagpaulan ng tres sa Thunder win

OKLAHOMA CITY — Nagsalpak si Paul George ng 5-of-6 shooting sa three-point range para umiskor ng 31 points habang nagdagdag si Dennis Schroder ng 23 markers sa 122-113 panalo ng Thunder laban sa bisitang Utah Jazz.

Humakot si center Steven Adams ng 22 points sa unang pagtutuos ng dalawang Western Conference rivals matapos sibakin ng Utah ang Oklahoma City, 4-2 sa first round ng nakaraang playoffs.

Nagtala ng malamyang 4-of-18 shooting performance si Russell Westbrook, tumapos na may triple-double sa kanyang 12 points, 11 rebounds at 10 assists para sa pang-15 sunod na pagdomina ng Thunder laban sa Jazz sa regular season sa kanilang tahanan.

Inilista ng Oklahoma City ang 17-4 record matapos simulan ang season sa 0-4. Tumipa si Donovan Mitchell ng 19 points, samantalang itinala ni Rudy Gobert ang kanyang pang-23 double-double sa season sa 13 points at 14 rebounds sa panig ng Utah.

Sa Chicago, humugot si De’Aaron Fox ng 23 sa kanyang 25 points sa second half at bumangon ang Sacramento Kings mula sa 14-point deficit para ta-lunin ang Bulls, 108-89.

Nag-ambag sina Bogdan Bogdanovic at Marvin Bagley III ng tig-16 points para isara ng Sacramento ang kanilang road trip sa 3-1 baraha.

Nalasap naman ng Chicago ang pang-siyam nilang kabiguan sa huling 10 laro kabilang ang franchise-record 133-77 loss sa Boston Celtics noong Sabado.

Binanderahan ni Zach LaVine ang Bulls sa kanyang 19 points kasunod ang 13 markers ni Lauri Markkanen.

Sa Dallas, naglista si Harrison Barnes ng 19 points, samantalang umiskor si rookie Jalen Brunson ng 17 markers para pangunahan ang Mavericks sa 101-76 pagdurog sa Orlando Magic.

Si Brunson ang pumalit kay starting point guard Dennis Smith Jr. na may right wrist sprain.