17th Asian Continental Chess Championships pangungunahan ni Pacquiao

MANILA, Philippines — Pamumunuan nina Senator Manny Pacquiao at National Chess Federation of the Philippines president at chairman Butch Pichay ang pagbubukas ng 17th Asian Continental Chess Championships (2nd Manny Pacquiao Cup) ngayon sa Tiara Hotel sa Makati City.

Gagawin nina Pacquiao, tumulong sa pagpopondo sa event, at Pichay ang ceremonial move sa opening ceremony na nakatakda sa alas-2:45 ng hapon sa nasabing nine-round tournament na naglalatag ng tiket para sa men’s at women’s World Cup.

Sinabi ni tournament director Grandmaster Jayson Gonzales na idaraos ang first-round pairings isang oras bago ang opening ceremony.

Isa si Indian Grand Master Vidit Santosh Gujrathi sa mga chessers na aabangan sa torneo.

Ang 24-anyos na si Vidit ay tumatayong No. 3 mula sa kanyang FIDE rating na 2702 sa likod nina Chinese GMs Wang Hao (2730) at Wei Yi (2728).

Babanderahan naman nina Filipino GMs John Paul Gomez, Darwin Laylo at Joey Antonio ang kampanya ng bansa sa men’s side, samantalang si WGM Janelle Mae Frayna ang gagabay sa women’s team.

Ang iba pang magsusuot ng uniporme ng bansa ay sina IMs Jan Emmanuel Garcia, Haridas Pascua at Paulo Bersamina.

Paparada rin sina Iranian GM Parham Maghsoodloo (2689), Indians GM Baskaran Adhiban (2682) at GM S. P. Sethuraman (2664) at Chinese GM Ni Hua (2683) bilang mga higher-ranked foreign players.

Outright GM title at norms ang matatanggap ng magkakampeon bukod pa ang premyong US$10,000.