Roach makakatulong sa pagsasanay ni Pacquiao kontra kay Broner
MANILA, Philippines — Sa unang pagkakataon matapos noong Hulyo ng 2017 ay muling nagkita sina Manny Pacquiao at long-time chief trainer Freddie Roach.
Nangyari ito sa ikalawang press conference para sa laban nina Pacquiao at American challenger Adrien Broner sa Beverly Hills sa Los Angeles, California.
Inihayag ni Pacquiao sa press conference sa New York ang muling pagkuha sa 58-anyos na si Roach bilang training supervisor para makatulong ni Filipino head trainer Buboy Fernandez.
May agam-agam si Fernandez na magkakaroon ng negatibong pagtanggap sa Team Pacquiao ang paghugot kay Roach.
“All I’m saying is is that I think the other (duties) in training, we should assign to Buboy to do that. My idea is to have Buboy handle the mitts and have Freddie just supervise,” paliwanag ni Pacquiao.
Ito ang unang pagkakataon na nagkausap sina Pacquiao at Roach matapos matalo ang Filipino world eight-division king kay Jeff Horn noong 2017 sa Brisbane, Australia.
Itataya ni Pacquiao (60-7-2, 39 KOs) ang suot na World Boxing Association welterweight title laban kay Broner (33-3-1, 24 KOs) sa Enero 19 sa MGM Grand sa Las Vegas, Nevada.
Naniniwala ang 39-anyos na si Pacquiao na malaki ang maitutulong ng eksperyensa ni Roach sa kanyang paghahanda laban sa 29-anyos na si Broner.
“I don’t have any problem with Freddie Roach. I always include him on my team,” ani Pacquiao bago ang formal portion ng Los Angeles news conference.
Matapos ilaglag si Roach ay hinirang ni Pacquiao ang kababatang si Fernandez bilang bagong chief trainer na nagresulta sa kanyang seventh-round TKO victory laban kay Lucas Matthysse ng Argentina noong Hulyo sa Kuala Lumpur, Malaysia.
- Latest
