Pocari tumangay ng panalo
MANILA, Philippines — Ibinuhos ng Pocari-Air Force ang ngitngit sa Adamson University nang itarak ang 25-18, 25-20, 25-23, upang magarbong tapusin ang kampanya sa Premier Volleyball League Season 2 Open Conference kagabi sa Batangas City Coliseum.
Naramdaman na naman ang ‘Bagyong Pablo’ matapos humataw si Reinforced Conference MVP Myla Pablo ng 15 attacks at isang block para sa Lady Warriors.
“Nag-usap kami na kailangan naming manalo para naman maganda ang standing namin. Kami naman ibinigay namin ang best namin as a team kahit hindi kami nakapasok sa Final Four,” wika ni Pablo, isa sa mga kandidato para sa Conference MVP award.
Nagbigay din ng kontribusyon sa opensa sina outside hitter Mary Ann Pantino at Iari Yongco kasama si playmaker Wendy Anne Semana, habang minanduhan nina Del Palomata at Jeanette Panaga ang depensa sa net.
Tinapos ng PocariAir Force ang kampanya sa torneo tangan ang 7-7 rekord.
Nalaglag naman ang Adamson sa 0-12 baraha.
Tsansa na sana ng Lady Falcons na ma-extend sa fourth set ang laban nang kunin ang 18-12 kalamangan sa third frame.
Subalit naglunsad ang Lady Warriors ng 8-0 atake sa likod nina Pantino, Palomata at Yongco para maagaw ang bentahe sa 20-12.
Ito ang nagbalik sa kumpiyansa ng Pocari-Air Force para makuha ang panalo.
Noong 2017 ay nagreyna ang Pocari sa Reinforced Conference.
Sa unang pagkakataon ay nabigo naman ang Lady Warriors na makapasok sa semis.
- Latest