Pacquiao-Broner fight pag-iinitin na

MANILA, Philippines — Opisyal nang ihahayag nina Filipino world eight-division champion Manny Pacquiao at American world four-division titlist Adrien Broner ang detalye ng kanilang bakbakan sa Enero 19 sa Las Vegas, Nevada.

Papagitna ngayon sa entablado sina Pacquiao at Broner sa Gotham Hall sa New York City bago dumiretso sa Waldorf Astoria sa Beverly Hills sa Los Angeles, California kinabukasan para kumpletuhin ang nasabing two-city press conference.

Matapos ang nasabing two-city press conference ay kaagad na uuwi ang Team Pacquiao para paghandaan ang ika-40 kaarawan ng Senador sa Disyembre 17 sa General Santos City.

Matapos ito ay sasabak si Pacquiao sa isang eight-week training kung saan ang unang bahagi ay ibubuhos niya sa Maynila at GenSan sa ilalim ni trainer Buboy Fernandez.

Idedepensa ng 39-an-yos na si Pacquiao (60-7-2, 39 KOs) ang kanyang hawak na World Boxing Association welterweight belt laban sa 29-anyos na si Broner (33-3-1, 24 KOs).

Pumirma si Pacquiao sa Premier Boxing Champions ni Al Haymon, ang long time adviser ni Floyd Mayweather, Jr. (50-0-0, 27 KOs) noong Oktubre para mabigyan ang mga boksingero ng kanyang MP Promotions ng pagkakataong makalaban sa US.

Kung tatalunin si Broner ay inaasahang mapaplantsa ang rematch ni Pacquiao kay Maywea-ther na bumigo kay ‘Pacman’ via unanimous decision sa kanilang mega showdown noong 2015.

Naagaw ni Pacquiao ang WBA world welterweight title ni Lucas Matthysse (39-5, 36 KOs) sa pamamagitan ng se-venth-round TKO victory noong Hulyo 15 sa Kuala Lumpur, Malaysia.

Umakyat naman si Broner sa boxing ring noong Abril 21 para sa 12-round majority draw kay Jessie Vargas (28-2-2, 10 KOs) sa Barclays Center sa Brooklyn.