Petro Gazz lalapit sa semifinals

MANILA, Philippines – Puntirya ng Petro Gazz ang importanteng panalo laban sa nangungunang Ateneo de Manila University upang makalapit sa semis slot sa Premier Volleyball League Season 2 Open Conference na magpapatuloy ngayong araw sa The Arena sa San Juan City.

Nakatakda ang bakbakan ng Gazz Angels at Lady Eagles sa alas-6 ng gabi.

Kung mananalo ang Petro Gazz, makakasiguro ito ng playoff para sa huling tiket sa Final Four.

Okupado na ng Ateneo (10-3), Creamline (9-2) at BanKo Perlas (9-3) ang unang tatlong silya sa semis kaya’t naiwan sa Petro Gazz (6-5), Pocari-Air Force (5-7) at Tacloban (5-7) ang duwelo para sa natitirang semis spot.

Kaya naman krusyal din ang laban ng Tacloban at Adamson University sa alas-4 ng hapon.

Kung mananalo ng dalawang beses ang Petro Gazz sa kanilang huling tatlong laro, awtomatiko itong uusad sa semis habang tuluyang malalag-lag ang Pocari-Air Force at Tacloban.

Masisilayan din ang paluan ng Creamline at BanKo Perlas sa alas-4 ng hapon sa larong gaganapin sa Cagayan de Oro City.

Pinaglalabanan ng Cool Smashers at Perlas Spikers ang No. 2 seeding sa Final Four kalakip ang magandang momentum bago sumalang sa best-of-three series sa semis.