Beermen pinatumba ang Texters sa Calasiao
MANILA, Philippines — Sa isang iglap ay nakabangon ang San Miguel mula sa 11-point deficit sa fourth quarter para ilista ang ikalawang sunod na panalo.
Kumolekta si import Kevin Murphy ng 27 points, 10 rebounds at 9 assists para pangunahan ang 107-96 pagresbak ng Beermen laban sa TNT Katropang Texters sa 2018 PBA Governor’s Cup kahapon sa Calasiao Sports Center sa Pangasinan.
Humugot si Murphy, naglaro para sa Utah Jazz a NBA, ng 11 markers sa pagratsada ng San Miguel sa final canto patungo sa pagtatala ng 4-4 baraha.
Napigilan naman ang tatlong dikit na arangkada ng TNT Katropa para sa kanilang 4-5 marka.
Ang basket ni PBA Best Import Marqus Blakely ang nagbigay sa Tropang Texters ng 86-75 bentahe sa 9:46 minuto ng fourth period.
Unti-unting nakalapit ang Beermen hanggang tuluyang maagaw ang 91-90 bentahe galing sa tirada ni Chris Ross patungo sa paglilista ng 101-92 kalamangan mula sa tres ni Murphy sa natitirang 1:22 minuto.
Isinalpak ni Murphy ang kanyang ikalawang triple sa final canto para kumpletuhin ang pagbangon ng tropa ni coach Leo Austria.
Nagdagdag si Christian Standhardinger ng 21 points para sa San Miguel kasunod ang 18, 13, 12 at 10 markers nina Arwind Santos, Lassiter, Kelly Nabong at Ross, ayon sa pagkakasunod.
Pinamunuan ni Blakely ang TNT katropa mula sa kanyang 26 points, habang nag-ambag ng 21 at 18 markers sina RR Pogoy at Terrence Romeo.
Samantala, maghihiwalay ng landas ang Alaska at Blackwater sa kanilang pagkikita ngayong alas-6:45 ng gabi matapos ang laro ng Rain or Shine at Meralco sa alas-4:30 ng hapon sa Smart Araneta Coliseum.
- Latest