Dyip sinagasaan ang Elasto Painters

MANILA, Philippines – Kasabay ng pagpigil sa kanilang siyam na su­­nod na kabiguan ay ti­napos ng Columbian ang 25-game losing skid sa sea­son-ending confe­rence.

Kumolekta si import Akeen Wright ng 23 points at 12 rebounds pa­ra tulungan ang sibak nang Dyip na talunin ang Rain or Shine Elasto Pain­ters sa 2018 PBA Go­vernor’s Cup kahapon sa Ynares Center sa Antipolo City.

Humugot si Wright ng 11 points sa fourth quarter na tinampukan ng tatlong three-point shots.

“It feels good. We don’t wanna end the season with an 0-11 record,” sa­bi ni Wright, nakahugot ng 18 markers kay Jer­ramy King kasunod ang tig-16 at 13 points kina Rashwan McCarthy, Ronald Tubid at Andres Cahilig, ayon sa pagka­ka­sunod.

Napigilan naman ang two-game winning run ng Rain or Shine na nag­la­gay sa kanilang kam­pan­ya sa panganib.

Tinalo ng Dyip ang Elasto Painters sa ikatlong sunod nilang pagtu­tu­os ngayong taon.

Ang triple ni Wright ang nagbigay sa Columbian ng 16-point lead, 86-70, bago ito pinalaki sa 91-70 mula sa tres ni King sa natitirang 3:03 mi­nuto ng final canto.

Hindi na ito nagawang paliitin ng Rain or Shine.

Umiskor si import Ter­rence Watson ng 18 points para sa Elasto Pain­ters.