Ginebra numinipis ang line-up

MANILA, Philippines — Lalong numipis ang line-up ng nagdedepensang kampeon na Barangay Ginebra sa 2018 Philippine Basketball Association (PBA) Go-vernors’ Cup.

Ito ay matapos dumagdag si Japeth Aguilar sa humahabang listahan ng injured players sa kampo ng Gin Kings.

Inamin ni Aguilar na hindi siya nagpahinga sa 118-124 kabiguan ng Gin Kings sa Elite kamakalawa, bagkus ay may iniinda siyang strained right calf injury na natamo niya sa practice ng Ginebra.

“May injury ako actually. Na-hurt ko ‘yung right calf ko nung last practice,” aniya.

Magugunitang nagpasiklab pa ang 6’9 power forward na si Aguilar nitong Lunes sa inilistang 16 puntos at siyam na rebounds para sa Gilas Pilipinas kontra Qatar sa 2018 International Basketball Federation (FIBA) World Cup Asian Qualifiers sa Smart-Araneta Coliseum.

Ngunit sa dulo ng la-rong iyon ay inamin niya nang naramdaman niya na ang naturang injury bago matuluyan sa ensayo ng Gin Kings.

“Actually, last two minutes ng Qatar game, dun ko naramdaman. Alam kong may game kami, tapos ‘yun, sinubukan kong mag-practice tapos during practice, na-injure ko sya ulit,” dagdag ni Aguilar na mawawala ng hanggang 10 araw.

Sinamahan ni Aguilar sa injured list ng Ginebra sina Raymond Aguilar, Greg Slaughter (left ankle), Jervy Cruz (bone spur) at Sol Mercado (knee).