Pirates tinalo ang Red Lions para walisin ang first round
MANILA, Philippines — Sa laban ng mga higante, naungusan ng Lyceum Pirates ang San Beda Red Lions sa huling dalawang minuto para itakas ang 73-66 panalo sa pagsasara ng first round ng 94th NCAA men’s basketball tournament kahapon sa FilOil Flying V Center sa San Juan City.
Nagtabla sa 64-64 ay bumida si CJ Perez sa 9-2 atake ng Pirates sa krusyal bahagi ng laro tungo sa kanilang pang-siyam na sunod na panalo at ihulog ang nagdedepensang Red Lions sa ikalawang puwesto sa 6-1 marka.
Pinamunuan ni reigning MVP Perez ang Pirates mula sa kanyang 22 puntos, 13 rebounds at 3 assists para walisin ang first round elimination sa 9-0 slate.
Sa ibang laro, nilampaso ng Letran Knights ang Mapua Cardinals, 84-63, para masungkit ang pang-limang panalo at muling makabalik sa ikaapat na puwesto kasama ang St. Benilde Blazers sa parehong 5-3 kartada.
Umani ng 20 points si JP Calvo na may kasamang 3 rebounds at 3 assists upang muling pumasok sa win column matapos matalo ng dalawang sunod.
Bukod kay Calvo, tumulong din ng triple-double performance si Bong Quinto sa kanyang 12 puntos, 10 rebounds at 11 assists, habang may 15 puntos at 14 rebounds naman kay Larry Muyang para sa tropa ni coach Jeff Napa.
“Na-address na namin ‘yung mga mistakes namin sa past two games,” sabi ni Napa.
Nag-ambag naman sina Bonbon Batiller at Christian Fajarito ng 11 at 10 markers, ayon sa pagkakasunod, para sa Letran.
Sa juniors division, tinambakan ng Mapua Red Robins ang Letran Squires, 83-63, upang masungkit ang pang-pitong panalo at manatili sa ikalawang puwesto sa pagtatapos ng first round.
- Latest
