Wong nagdagdag ng bronze sa Pinas
JAKARTA — Nagdeliber ang wushu artist na si Agatha Wong para sa Pilipinas sa ikalawang araw ng aksiyon sa 18th Asian Games dito.
Dinagdagan ni Wong ang dalawang bronze ng Pinas kamakalawa mula sa men at women’s poomsae team sa pamamagitan ng kanyang tansong medalya sa women’s tajiquan at tajijian all-around event.
Umiskor ng total na 19.42 ang 20-anyos na si Wong na sumapat para sa third place matapos magtala ng 9.68 sa taijiquan para makatabla sa third place noong Linggo at 9.68 din sa taijijian kahapon sa kompetisyong ginaganap sa Jakarta Convention Center kung saan idinadaos din ang iba pang martial arts event.
Pinagsama ang taijiquan at taijijian dito sa Asian Games imbes na hiwalay na event katulad sa Southeast Asian Games kung saan nanalo si Wong ng silver at gold sa Malaysia noong 2017.
“I just had no expectations. I just wanted to do my best, and I think I did my best. I think that’s worth it na din,” sabi ni Wong na nakapagdeliber pa rin kahit may iniindang tendinitis at masakit na tuhod. “I was so nervous because I place fifth in the first discipline. I had to make sure of an impressive performance in the second discipline so I can have a chance.”
Nakopo ni Lindswell Lindswell ng host Indonesia na umiskor ng 19.50 na personal na sinaksihan ni Indonesian President Joko Widodo, habang ang silver ay napunta naman kay Juanita Mok ng Hong Kong na umiskor ng 19.46.
Kasalukuyan pang lumalaban ang RP Blu Girls, nanalo sa kanilang opening game kontra sa Hong Kong 7–0, laban sa Korea habang sinusulat ang balitang ito sa GBK softball field.
Susundan ito ng laban ng tropa sa China sa alas-8 (9 p.m. Manila time) kagabi.
Sa JI Expo, hanggang round-of-16 lamang umabot ang mga fencers na sina Maxine Esteban at Samantha Kyle Catandan sa women’s foil event, habang pang 11th lamang si Ellen Rose Perez sa 48 kg women’s division ng weightlifting.
On going pa ang laban ng isa pang weightlifter na si Nestor Colonia.
Sa shooting sa Jabakaring Sports City shooting range, pumasok sa finals Pinoy bet Hagen Topacio matapos tumira ng 118 sa men’s trap event, ngunit nabigong pumuwesto para sa medalya matapos malaglag sa No. 6.
Naitala naman ng RP Blu Girls ang ikalawang sunod na panalo matapos ang opening win sa Hong Kong 7–0 kamakalawa ng gabi nang kanilang igupo ang Korea, 5-3.
Nakatakda pa nilang labanan ang China kagabi sa GBK softball field.
Sa cycling, kapwa tumapos sina John Derrick Farr at Leah Belgira sa sixth place sa downhill event ng mountain bike competition kung saan winalis ng Indonesia ang lahat ng nakatayang mga medalya.
Walong segundo ang layo ni Farr kay gold medal winner Khoiful Mukhib (2:16.687), habang 22 segundo ang agwat ni Belgira kay Tiara Andini Prastika (2:33.056).
Nakatakdang sumabak sa cross country sina Ariana Thea Patrice Dormitorio at Niño Surban.
- Latest
