Pirates sinalakay ang Knights
MANILA, Philippines – Nalusutan ng Lyceum Pirates ang Letran Knights, 87-82, upang mapanatili ang malinis na kartada sa 94th NCAA basketball tournament kahapon sa FilOil Flying V Center sa San Juan City.
Binura ng 2017 runner-up na Pirates ang 11-point deficit, 63-74, sa huling 6:46 ng fourth period sa pamamagitan ng mahigpit na depensa na naglimita sa Knights sa isang puntos lamang sa huling 2:50 minuto ng laro para masungkit ang pang-walong panalo.
Lamang pa ang Letran, 82-81, pero humataw sina CJ Perez, Jaycee Marcelino, Jesper Ayaay at Reymar Caduyac ng 7-1 run para itakas ang panalo bilang paghahanda sa muling pagtatagpo sa nagdedepensang San Beda Red Lions sa Martes.
Umani si Jesper Ayaay ng 20 puntos at 4 rebounds, habang si Mike Nzeusseu ay tumapos ng 16 puntos at 10 rebounds at 16 puntos na may kasamang 6 boards mula sa reigning MVP CJ Perez.
Tumulong din ng anim na puntos si Caduyac kabilang na ang dalawang free throws sa huling 58 segundo para bawiin ang kalamangan, 82-81.
Umiskor si JP Calvo ng 18 puntos, siyam nito sa ikaapat na yugto, para pangunahan ang Knights, habang may 13 puntos si Bong Quinto para sa Letran.
Sa ibang laro, kahit wala si Clement Leutcheu ay nagwagi pa rin ang St. Benilde Blazers kontra sa Arellano Chiefs, 70-62, habang nasungkit na rin ng Jose Rizal Heavy Bombers ang kanilang unang panalo matapos makaeskapo ng 57-55 panalo laban sa Emilio Aguinaldo Generals.
Dahil sa malaking panalo ay umabante ang Blazers sa pang-apat na puwesto sa 5-3 kartada sa likuran ng nangungunang Pirates (8-0).
- Latest