Finals target ng Kings
MANILA, Philippines — Natulala si two-time PBA Grand Slam coach Tim Cone ng Barangay Ginebra nang makadikit ang Rain or Shine sa 72-74 agwat sa huling 9.8 segundo ng fourth period sa Game Three noong Sabado.
Ikinadismaya ni Cone ang pagpapabaya ng Gin Kings sa itinayong 25-point lead, 46-21, sa second quarter at ang double-digit advantage sa huling tatlong minuto ng final canto laban sa Elasto Painters.
“That’s something we have to talk about, prepare for because we didn’t respond well,” wika ni Cone.
Ang split ni LA Tenorio ang nagbigay sa Ginebra ng 75-72 abante para talunin ang Rain or Shine at angkinin ang 2-1 bentahe sa kanilang best-of-five semifinals series.
Pipilitin ng Gin Kings na tuluyan nang angkinin ang silya sa PBA Finals sa pagsagupa sa Elasto Painters ngayong alas-7 ng gabi sa 2018 PBA Commissioner’s Cup sa Smart Araneta Coliseum.
Sakaling manalo ang Ginebra ay maglalaro sila sa pang-25 PBA Finals, habang kung makakatabla ang Rain or Shine ay gagawin ang Game Five sa Miyerkules sa Big Dome.
“We have to find a way to start better to keep us in the game earlier to have a chance,” sabi ni mentor Caloy Garcia sa kanyang mga Elasto Painters.
- Latest