Calvo hinirang na NCAA Player of the Week
MANILA, Philippines — Nakuha ng beteranong si JP Calvo ng Letran Knights ang Chooks to Go-NCAA Press Corps Player of the Week honor sa ikalawang linggo ng NCAA Season 94.
Si Calvo ang nanguna sa 83-76 panalo ng Knights laban sa San Sebastian Stags noong Biyernes.
Nagposte si Calvo ng 16 puntos mula sa 6-of-11 shooting para pamunuan ang opensa ng Letran na ngayon ay may 1-1 kartada.
Natalo ang Knights sa Perpetual Help Altas, 75-78, noong Hulyo 13.
“Kasi ang maganda lang dito nagtutulungan kami. Tinutulungan din nila ako kung paano ko sila dalhin,” ani Calvo.
Para naman kay Letran coach Jeff Napa, pinatunayan din ni Calvo bilang lider ng koponan.
“Kinausap ko ‘yung dalawang veterans ko, si Bong Quinto at JP (Calvo). Ipinakita ko sa kanila ‘yung bigger picture. Iyong teammates nila sumunod naman sila. Sa dulo, sila ‘yung kakapitan ko,” pahayag ni Napa.
Ang ibang pinagpilian para sa nasabing weekly honor ay sina Letran teammate Quinto, Ian Alban, Levi Dela Cruz ng Arellano University Chiefs at Yankie Haruna ng College St. Benilde Blazers.
- Latest
