Go for Gold gusto ng magandang puwesto sa semis
MANILA, Philippines — Pasok na sa semifinal round ang Go For Gold at Marinerong Pilipino-Technological Institute of the Philippines, ngunit hangad pa rin nila ang panalo para makapuwesto ng mas maganda sa 2018 PBA D-League Foundation Cup sa Ynares Sports Arena sa Pasig City.
Hawak ang 6-2 kartada, asam ng Go For Gold na makasalong muli sa tuktok ang lider na Che’Lu, habang tangka naman ng Marinero na makatabla sa segunda puwesto.
Iyon ang dahilan kung bakit inaasahang magiging mainit ang laban ng dalawang koponan sa mahalaga nilang banggan ngayong ala-1 ng hapon.
Sasandal ang Scratchers sa kanilang malaking 75-60 panalo kontra sa Centro Escolar University noong nakaraang Lunes kung saan binanderahan sila ng bagong manlalaro na si Rey Publico na nagtala ng 18 puntos at 11 rebounds.
Sinagip ni Publico ang kulang-kulang na line-up ng Go For Gold bunsod ng pansamantalang pagliban ni Gab Banal (family reason) gayundin nina James Martinez, Jerwin Gaco at Ron Dennison dahil sa injuries.
Sa inaasahang pagbabalik ng mga naturang manlalaro ay pinapaborang manaig ang Scratchers sa tulong din ng isa pang pambato na si Matt Salem.
Sa kasamaang palad, wala na sa kampo ng Go For Gold ang collegiate star na si Paul Desiderio dahil sa pagbabalik nito sa training camp ng University of the Philippines para sa papalapit na University Athletic Association of the Philippines (UAAP) Season 81.
Ngunit hindi basta-basta yuyukod ang Engineers na kasalukuyang nakasakay sa three-game winning streak at ang pinakabago rito ay ang 80-74 panalo sa sibak nang Batangas-Emilio Aguinaldo College.
Matapos ang kumpletong 20 puntos, anim na rebounds at four steals kontra sa Generals ay naatasang trangkuhan ni Filipino-American Trevis Jackson ang atake ng Engineers kasama sina Abu Tratter at Robbie Manalang.
Samantala sa isa pang laro sa alas-3 ng hapon ay susubok namang mapaganda ng mga tanggal nang koponan na AMA Online Education (0-9) at Batangas-EAC (3-6) ang kanilang mga baraha papalapit sa dulo ng elimination round ng nasabing torneo.
- Latest
