Isa pang Saludar susubok sa WBO flyweight crown
MANILA, Philippines — Matapos ang kanyang kapatid na si Vic Saludar ay si Froilan naman ang magtatangkang maging isang lehitimong world boxing champion.
Sumasakay sa isang five-fight winning streak, nakatakdang hamunin ni Saludar si Japanese world flyweight titlist Sho Kimura sa Hulyo 27 sa Qingdao, China.
Hangad ni Saludar (28-2-1, 19 KOs) na maagaw kay Kimura (16-1-2, 9 KOs) ang suot nitong World Boxing Organization flyweight crown.
Nauna nang tinalo ng kanyang nakababatang kapatid na si Vic Saludar (18-3-0, 10 knockouts) si Ryuya Yamanaka (16-3-0, 5 KOs) via unanimous decision para hubarin sa Ja-panese ang hawak nitong WBO minimumweight title noong nakaraang linggo sa Kobe, Japan.
Samantala, matapos matalo kay Takuma Inoue ng Japan noong 2016 ay limang sunod na panalo na ang itinala ni Froilan para maupo sa No. 4 sa WBO flyweight rankings.
Gumawa naman ng pangalan ang 29-anyos ding si Kimura matapos agawin kay Chinese boxing star Zou Shiming ang bitbit nitong WBO flyweight belt via 11th round TKO noong 2017 sa Shanghai, China.
Matagumpay na naidepensa ni Kimura ang kanyang korona noong Disyembre nang umiskor ng ninth-round TKO win laban sa kababayang si Toshiyuki Igarashi sa Tokyo, Japan.
- Latest