Bea De Leon babalik sa Lady Eagles

MANILA, Philippines – Magbabalik si middle blocker Bea De Leon sa kampo ng Ateneo de Manila University para sa UAAP Season 81 women’s volleyball tournament.

Matapos ang ilang buwang pag-iisip, kinumpirma mismo ni De Leon ang desisyon nitong gamitin ang kanyang fifth playing year para tulungan ang Lady Eagles sa tangkang maibalik sa kanilang pugad ang kampeonato.

“I rarely get this chance to play five years in UAAP. There’s an unfinished business for me and if there’s a chance to reach my goal, I’ll definitely go for it,” wika ni De Leon.

Galing si De Leon sa kampanya sa Philippine Superliga Invitational Conference kung saan bahagi ito ng Foton Tornadoes na nagtapos sa ikapitong puwesto.

Ilang beses nang nasilayan si De Leon sa training ng Lady Eagles.

Kaya naman mananatili ang bangis ng Ateneo sa UAAP dahil nariyan din sina middle blocker Maddie Madayag at outside hitter Kat Tolentino.

Inaasahang magbabalik na rin si opposite/open spiker Kim Gequillana na galing sa injury.

May ilang rookies din ang papasok sa tropa ayon kay Ateneo mentor Oliver Almadro na humalili kay Thai coach Tai Bundit.

Nauna nang nagpasya si wing spiker Jhoana Maraguinot na lisanin ang Lady Eagles at huwag nang gamitin ang kaniyang final year playing eligibility.

Pumirma si Maraguinot ng kontrata sa Sta. Lucia Lady Realtors na naglalaro rin sa PSL.