Beram hindi inilaglag ni Juico sa Phl team
MANILA, Philippines — Hindi aalisin si Fil-Am Trenten Beram sa national team na lalahok sa darating na 2018 Asian Games sa Indonesia.
Nilinaw ni Beram kay Philippine Athletics Track and Field Association (PATAFA) president Philip Ella Juico ang dahilan kung bakit hindi siya nakalahok sa nakaraang 2018 Korean Open.
“He made the mistake of going in the Ayala Open in Ilagan, Isabela really tired because the US NCAA has just concluded during that time,” wika ni Juico sa 200m at 400m gold medalist sa 2017 Southeast Asian Games sa Kuala Lumpur, Malaysia.
Sinabi ni Beram na dahil sa sobrang kapaguran ay hindi na siya nakasali sa nakalipas na Korean Open.
Samantala, binigyan naman ni Juico si Fil-Am Eric Shaun Cray, ang gold medal winner sa 400m hurdles event ng SEA Games, ng 10 araw para magpaliwanag kung bakit hindi nakatakbo sa event sa Korea.
“They (PATAFA execom) gave him 10 days to respond why he didn’t show up in Korea,” ani Juico. “I actually give him five days but they advised me to make it 10.”
Sinabi ng coach ni Cray na inuna ng Fil-Am trackstar ang kanyang trabaho para sa asawa at apat niyang anak kesa lumahok sa Korean Open.
“I heard he’s working. It might be because their monthly allowance was cut to P27,000 and he has a family to feed,” ani Juico kay Cray. “We have to find ways to make it work for him.”
Planong isabak ng PATAFA sina Cray at Beram, mga gold medal winners sa nakaraang SEA Games, sa men’s 4x100m relay team sa 2018 Asian Games kasama sina Clinton Bautista at Anfernee Lopena.
Idaraos ang quadrennial event sa Agosto 18 hanggang Setyembre 2.
- Latest
