Higanteng players NBA top-2 picks
NEW YORK -- Dalawang higanteng collegiate stars ang hinirang na No. 1 at No 2 overall pick sa 2018 NBA Draft kahapon.
Pinili ng Phoenix Suns si 7-foot Deandre Ayton ng Arizona habang hinirang ng Sacramento Kings si 6’11 Marvin Bagley III ng Duke bilang No. 1 at No. 2 overall selection, ayon sa pagkakasunod.
Si Ayton ay isang 260-pound center na magiging sentro ng depensa ng Sun, nangulelat sa NBA sa points allowed para sa kanilang pinakamasamang record sa nakaraang 2017-18 season.
“The fans out there are amazing, the best fans in the world,” wika ni Ayton. “I’m really happy to be a Phoenix Sun and start a winning legacy with Devin Booker and Josh Jackson and all the other guys. We’re a young team and we’re ready.”
Bumandera ang 19-anyos na si Ayton sa hanay ng mga national leaders sa rebounds (11.6 per game) at blocks (1.9 per game) sa nakaraang season.
Iginiya rin ng tubong Bahamas ang Arizona Wildcats sa paglilista ng 27-win season at umabot sa No. 2 sa national ranking.
Si Ayton ang ikala-wang player mula sa Bahamas na kinuha bilang No. 1 overall pick sa NBA Draft matapos si Mychal Thompson — ama ni Golden State Warriors All-Star Klay Thompson — noong 1978.
Si Bagley naman, ay isang versatile frontcourt player na makakatulong sa Kings team, nagtala ng fewest points sa nakaraang NBA season.
Naglista ang 19-anyos na si Bagley ng average na 21.0 points per game mula sa 61.4 percent shooting.
Samantala, nagpalitan ng picks ang Atlanta at Dallas.
Nahugot ng Dallas si 6’8 international star Luka Doncic bilang No. 3 bilang kapalit ni high-scoring Oklahoma point guard Trae Young, ang No. 5 pick, kasama ang isang 2019 first-round pick.
Pinili ng Memphis Grizzlies si Michigan State 6’11 Jaren Jackson Jr. bilang No. 4 at kinuha ng Orlando Magic si 7-foot Mo Bamba bilang No.7.
Related video:
- Latest
