Phl women’s volleyball team doble kayod sa PSL

MANILA, Philippines — Isang malaking hamon para sa mga Philippine women’s volleyball team sa pangunguna ni team captain Aby Maraño na maglalaro sa Philippine team at sa kanyang club team sa 2018 Chooks to Go-Philippine Superliga Invitational Conference na nakatakdang mag-umpisa bukas sa Smart Araneta Coliseum.

Sinabi ni Maraño na kahit non-bearing lang ang mga laro ng national team, ito ay mahalaga para iangat ang kahandaan ng koponan na maglalaro sa darating na 2018 Asian Games sa Palembang at Jakarta, Indonesia sa Agosto 18-Setyembre 2.

“It’s really a big challenge for us playing with the national team and for our respective clubs. Pero kailangan ito para masiguro ang kahandaan ng pambansang koponan,” ayon kay Maraño ng F2 Logistics Cargo Movers.

Maglalaro ang national team ng anim na games sa PSL Invitational Cup kaya doble ang pagsisikap nina Maraño, Mika Reyes (Petron), Francis Molina (Petron), Cha Cruz (F2 Logistics), Dindin Santiago-Manabat (Foton), Mary Joy Baron (F2 Logistics), Jaja Santiago (Foton), Kim Dy (F2 Logistics), Kim Fajardo (F2 Logistics) at Dawn Macandili (F2 Logistics).

Kasama sa national team sina Alyssa Valdez at Jia Morado ng Creamline Cool Smashers ngunit hindi sila makakalaro sa PSL Invitational Cup dahil sa on-going quarterfinal round ng Premier Volleyball League.

Ayon naman kina coaches Rommel Abella ng Foton, Kungfu Reyes ng Smart, George Pascua ng Sta. Lucia, Sherwin Meneses ng Generika-Ayala, hindi nila bibigyan ng magaan at madaling pa-nalo ang national team para na rin sa objective na makikita nila ang kanilang strength at weaknesses at malaman kung ano pa ang dapat ma-improve.

“Ito rin ang dapat matutunan ng national team para matulungan natin sila. It’s for the good of the team,” sabi ni coach Pascua.

May kabuuang sampung koponan ang sasabak sa PSL Invitational Cup sa pangunguna ng defending champion Cignal HD kabilang na ang dalawang guest teams University of the Philippines-United Auctioneers at University of the East-Cherrylume.

Ang ibang kasali ay ang bagong Grand Prix champion Petron Blaze, F2 Logistics, Generika-Ayala, Foton Tornadoes, Smart Giga, Cignal HD, Sta. Lucia at Cocolife Asset Managers.