Meralco tuloy ang pananalasa

MANILA, Philippines — Kasabay ng pagpigil sa seven-game winning streak ng Alaska ay itinuloy ng Meralco ang kanilang pananalasa sa apat na sunod.

Anim na players ang umiskor ng double digits para banderahan ang Bolts sa 89-74 pagpapatumba sa Aces sa 2018 PBA Commissioner’s Cup kahapon sa Smart Araneta Coliseum.

Tumapos si 2017 PBA Rookie of the Year Chris Newsome na may 18 points at 8 assists para sa pagsosyo ng Meralco sa Alaska sa ikalawang puwesto sa magkatulad nilang 7-2 kartada na nagpasikip sa labanan sa dalawang ‘twice-to-beat’ bonus sa eight-team quarterfinals.

Nagdagdag sina Jared Dillinger at Baser Amer ng tig-17 markers habang tumipa sina import Arinze Onuaku, Niño Canaleta at Ranidel De Ocampo ng 14, 11 at 10 points, ayon sa pagkakasunod.

“We had balanced scoring. A lot of guys contributed offensively,” sabi ni one-time PBA Grand Slam champion coach Norman Black, nakahugot kay Onuaku ng 23 rebounds.

Naging maigting ang bakbakan sa first half kung saan tinangay ng Bolts ang one-point lead, 41-40 sa halftime bago kumamada ng 20-9 atake para ibaon ang Aces sa 61-49 sa 4:50 minuto ng third quarter.

“We knew that they’re gonna come and they’re gonna play hard that’s just how Alaska is. We knew that they’re gonna pressure us a lot and we just have to take care of the ball,” ani Newsome.

Ang slam dunk ni Onuaku ang nagbigay sa Meralco ng 17-point lead, 70-53 sa huling 1:34 minuto ng naturang yugto hanggang makalapit ang Alaska sa 65-73 sa 9:30 minuto ng fourth period.

Ngunit gumanti ang Bolts ng 9-0 bomba mula sa four-point play ni Amer, drive ni Onuako triple at salaksak ni Dillinger para ilista ang 84-65 kalamangan sa huling 6:41 minuto ng laro.