Iloilo naman ang pasasayahin ng PBA
MANILA, Philippines – Matapos dayuhin ng PBA ang Mindanao sa Davao Del Sur para sa Mindanao leg at ang mga taga-Batangas para sa Luzon leg ng PBA All-Stars, ang mga taga-iloilo naman ang susunod.
Sasagupain naman ngayon ng Smart All-Stars ang Visayas Selection na gaganapin sa University of San Agustin Gym.
Alas-7:00 ng gabi sisimulan ang pagtatapat ng Visayas All-Stars ni coach Chito Victolero at Smart Gilas squad ni coach Nash Racela.
Nakabawi ang Smart All-Stars sa 130-144 kabiguan sa Mindanao Selection sa Digos City, matapos ang 152-149 panalo sa Luzon Selection kamakalawa ng gabi sa Batangas City Coliseum.
Sa pagkakataong ito, hindi sa Smart National team lalaro si June Mar Fajardo kundi pangungunahan niya ang Visayas All-Stars bilang isang Cebuano kasama ang kapwa niya Gilas team members na sina Kiefer Ravena at Terrence Romeo.
Makakasama nina Fajardo, Ravena at Rosario sina James Yap, Asi Taulava, Chris Ross, Greg Slaughter, JR Quiñahan, Jeff Chan, Emman Monfort, Jericho Cruz at Ronald Tubid na pumalit sa may injury sa tuhod na si Joe Devance.
Pangungunahan naman nina Japeth Aguilar, Calvin Abueva, Troy Rosario, Jayson Castro at Matthew Wright ang Smart Gilas team kasama sina Carl Bryan Cruz, Mac Belo, Allein Maliksi at Jio Jalalon na pumalit kay Roger Pogoy.
Bukod sa mga regular activities na meet and greet at basketball clinics, lilibot din sakay ng motorcade ang buong delegasyon bago ang outreach program sa mute and deaf community.
Inaasahang hindi bibiguin ang mga Ilonggo ng kanilang mga produktong sina Monfort, Cruz, Ravena, Tubid at Yap na tubong Escalante ngunit sa Iloilo nag-high school.
- Latest