Luzon All-Stars naman ang susubok sa Smart All-Stars

BATANGAS CITY, Philippines — Matapos ang Mindanao team, hangad din ng PBA Luzon selection na palasapin ng kabiguan ang Smart All-Stars sa second leg ng 2018 PBA All-Star Game ngayon sa Batangas City Coliseum.

Magsasagupa ang Luzon squad ni Leo Austria ng San Miguel at ang Nationals ni Yeng Guiao ng Rain or Shine ngayong alas-7 ng gabi matapos ang All-Star skills challenge sa alas-4:30 ng hapon.

Pangungunahan nina San Miguel stars Arwind Santos, Alex Cabagnot at Marcio Lassiter, Ginebra ace guard LA Tenorio, Magnolia lead guns Paul Lee at Ian Sangalang, Globalport star Stanley Pringle at Rain or Shine center Raymond Almazan ang Luzon selection.

Paparada naman para sa Smart All Stars sina June Mar Fajardo, Carl Bryan Cruz, Troy Rosario, Mac Belo, RR Pogoy, Allein Maliksi, Terrence Romeo, Gabe Norwood, Jio Jalalon at Kiefer Ravena.

Magagamit din ni Austria sina Gilas players Japeth Aguilar, Jayson Castro, Calvin Abueva at Matthew Wright.

Sa first leg noong Miyerkules sa Davao del Sur ay nabigo ang Smart Team sa Minda-nao squad, 130-144.

“We showed our pride as Mindanaoans playing before fellow Mindanaoans. With wounded pride, Smart could well be a different team in Batangas,” wika ni Mark Barroca sa nasabing panalo ng Minadanao team.

Samantala, pamumunuan ni dating MVP winner Asi Taulava ang mga big men sa Obstacle Challenge.

Makakasama niya sa event sina Sonny Thoss, Raymond Aguilar, JP Erram, Kelly Nabong, Russell Escoto, Ken Bono, Justin Chua, Aldrech Ramos, Beau Belga, Gabby Espinas at Yousef Taha.

Itataya naman ni Maliksi ang kanyang titulo sa Three-Point Shootout kontra kina Romeo, James Yap, Lassiter, Lee, Wright, Tenorio, Pringle, Jvee Casio ng Alaska, Ro-nald Tubid ng Columbian Dyip, Nino Canaleta ng Meralco at Larry Fonacier ng NLEX.

Sa slam dunk competition, idedepensa ni titleholder Chris Newsome ang kanyang titulo laban kina Rey Guevarra, Mat Rosser, Marion Magat, Renz Palma at Lervin Flores.