2 Japanese teams interesado kay Jaja
MANILA, Philippines – Dalawang Japanese volleyball clubs ang nagpahayag ng interes kay reigning UAAP Season 80 Most Valuable Player Jaja Santiago.
Hindi inihayag ni Santiago ang eksaktong pangalan ng dalawang koponan ngunit handa siyang gawin ang lahat upang makahirit ng puwesto sa pamosong volleyball league sa Japan.
Ngunit hindi magiging madali ang daang tatahakin ng 6-foot-5 middle blocker dahil kailangan pa niyang sumalilalim sa tryout para makita nang harapan ng mga Japanese coaches ang kanyang abilidad at husay.
Kaya naman nakatakdang magtungo si Santiago sa Japan sa huling bahagi ng buwan para tuparin ang kanyang pangarap na makapaglaro sa international league bilang import.
Tinutulungan si Santiago ni Japanese head coach Shun Takahashi na tumayong assistant coach ng Philippine Superliga Selection na sumabak sa nakaraang FIVB Women’s Club World Championships noong 2016.
“May dalawang teams na interested. Para sa akin mas maraming opportunities kung sa Japan ako maglalaro. May mga invitations din from coach Shun and other coaches,” wika ni Santiago.
Bago pumasok sa National University noong UAAP Season 76 ay nais na siyang kunin ng University of California (Los Angeles) para maglaro sa US NCAA Division I.
May mga teams din mula sa Chinese-Taipei at South Korea ang nagpaghayag ng intensyon sa dating star player ng Lady Bulldogs.
Bago magsimula ang UAAP Season 80 ay inimbitahan din si Santiago na maglaro para sa Bangkok Glass sa Thailand Volleyball League.
Subalit tinanggihan ito ni Santiago at nagpasyang tapusin ang kanyang playing years kasama ang Lady Bulldogs.
Nakaabot sa Final Four ang NU subalit natalo sa De La Salle University sa semifinals.
Nakapaglaro si Santiago sa PSL Grand Prix kasama ang Tornadoes na tumapos sa ikatlong puwesto sa likod ng nagkampeong Petron Blaze Spikers at sa pumangalawang F2 Logistics Cargo Movers.
- Latest