Che’Lu amoy na ang korona ng D-League

MANILA, Philippines — Pinigil ng Che’Lu Bar and Grill-San Se­bas­tian ang Zark’s Bur­ger-Lyceum sa Game One, 107-103, para sa 1-0 abante sa kanilang best-of-three championship series sa 2018 PBA De­ve­lopmental League As­pirants’ Cup kahapon sa Pasig Sports Center.

Tabla pa ang laban sa 101-101 sa huling 1:18 minuto sa orasan nang magtarak si Samboy De Leon ng nagliliyab na tres para ibigay sa Re­vellers ang bahagyang 104-101 kalamangan.

Bagama’t inilapit ni Most Valuable Player front runner CJ Perez ang Jawbreakers sa 103-104 agwat matapos ang dalawang free throws, gumanti naman kaagad si Michael Calisaan ng pang-selyong lay-up sa huling 28 segundo para sa 106-103 bentahe ng Revellers sa natitirang 28 segundo sa laro.

May tsansa pa sa­nang tumabla ang Zark’s ngunit sablay ang tres ni MJ Ayaay na siyang nagbigay daan sa split ni Allyn Bulanadi para sa Che’Lu at sa pinal na 107-103 iskor.

Bunsod nito, lumapit ng isang panalo ang Re­vellers para sa asam na kampeonato kahit wala na ang pambato na si Jeff Viernes na umakyat sa PBA para sa Globalport Batang Pier.

“Tsina-challenge ko ang guards na even wa­la si Jeff. We can still win and they proved it. Good comeback for our team,” wika ni head coach Steven­son Tiu sa kanyang Che’Lu.

Pinangunahan ni De Leon ang balanseng ata­ke ng Revellers mula sa itinalang 18 points na may sahog pang 5 rebounds at 3 assists.

Nag-ambag naman ng 17 points  at 10 rebounds si Alfred Batino gayundin si Calisaan na may 15 markers at 12 rebounds, habang may tig-13 sina Ryan Costelo at Bulanadi.

Samantala, napatid na­man na ang ‘Cinde­rella run’ ng Zark’s sa kabila ng ipinosteng 23 points at 8 rebounds ni Jaycee Marcelino.

Humakot naman ng 19 points, 11 rebounds, 2 steals at 3 blocks si Mike Nzeusseu.

Maaari nang angkinin ng Che’Lu ang koro­na sa panalo sa Game Two bukas.