Hernandez, Pacquiao tiwala sa isa’t isa
MANILA, Philippines – Imbes na si coach Freddie Roach na siyang nakasanayang laging katabi ni Manny Pacquiao sa mga press conference ng kanyang mga laban ay si Buboy Hernandez ang kasama niyang humarap sa media sa official launching ng kanilang laban ni Lucas Matthysse sa July 15 sa Malaysia.
Bagama’t itinatanggi ni Pacquiao na wala na sa eksena ang batikang coach, wala ni anino ni Roach ang dumating sa press conference ng laban na ginanap sa City of Dreams kahapon.
Buong pagkukumbabang tumayo sa podium si Hernandez sa likod ng malakas na pagtsi-cheer ng kanyang mga tagasuporta sa loob ng Grand Ballroom ng naturang venue.
“Malaking responsibilidad ang nasa balikat ko,” sabi ng kababata at matagal nang assistant trainer ni Pacquiao.
At siyempre, tiwala siya sa kakayahan ng kanyang kaibigan na mapagtagumpayan ang napipintong laban sa edad na 39-gulang.
“Puno lang ang tumatanda, bata pa ang fighter ko,” ang binitiwang salita ni Hernandez.
Parehong sinabi nina Pacquiao at Hernandez na puwede pang pumasok si Roach sa eksena.
“Habang wala pa yung kapitan ng barko, bilang assistant, gampanan muna natin yun. Kasi ang final words pa din na kay senador,” ani Hernandez. (CBV)
Related video:
- Latest
