Dela Cruz pumana ng 2 gintong medalya

MANILA, Philippines — Binigyan ni Paul Mar­ton Dela Cruz ang Philippine national team ng dalawang gintong medalya matapos mag­wa­gi sa Olympic round ng individual men’s compound event sa 20­18 Asia Archery Cup Stage 2 kahapon sa Rizal Me­morial Baseball field sa Malate, Manila.

Tinalo ni Dela Cruz si Chen Hsiang-Hsuan ng Chinese-Taipei, 10-9, sa shoot-off.

Nangyari ang shoot-off pagkaraang tumapos sila sa parehong 143 puntos mula sa pi­nakawalang 30 arrows at hindi na pinakawalan ni Dela Cruz ang gintong medalya.

Dumaan sa matin­ding laban si Dela Cruz patungo sa fi­nals.

Tinalo muna niya si Pan Yu Ping ng Chinese-Taipei sa second round, 144-140, at sinundan ng panalo laban sa isa pang Taiwanese na si Lin Hsin-Min sa quar­ter­fi­nals bago nagwa­gi kay Aman Saini ng India, 148-146, sa semifinal round.

Ito ang ikalawang gold medal ng 31-anyos na si Dela Cruz matapos sa indivi­dual men’s compound qualification noong Sabado na nag­bigay sa 2014 Asian Games bronze medalist ng top seed at first round bye sa Olympic round.

Sa kanyang kabu­u­ang 704 puntos mula sa 354 sa first round at 350 sa second round, tumabla siya kay Lin Che-Wei ng Taiwan ngunit naku­ha ng Filipino archer and panalo dahil mas ma­rami pa siyang arrows sa 10 at X rings, 57-46.

“Hindi ko talaga ina­­asahan ito. Nanatili lang ang focus ko kahit ninerbiyos na ako kaya lu­mabas ang best ko,” sabi ni Dela Cruz.

Ang iba pang miyem­bro ng national team ay sina Kareel Hongitan, Nicole Tagle, Pia Bidaure at Ferimi Bajado sa recurve women at  sina Amaya Paz-Cojuangco, Jennifer Chan, Andrea Robles at Rachell Dela Cruz sa compound wo­men.