Magnolia gustong maka-2
Pinagtulungan si June Mar Fajardo ng San Miguel na depensahan nina Daniel Pascual Rafi Reavis ng Magnolia sa Game 1 kamakalawa. Joey Mendoza
MANILA, Philippines — Nang magtayo ng 20-point lead ang nagdedepensang San Miguel sa unang tatlong minuto ng third quarter ay naisip ni coach Leo Austria na bigyan ng playing time ang kanyang mga bench players ngunit nagkamali siya.
Bumalikwas ang Magnolia sa fourth period para agawin ang 105-103 panalo sa Game One ng kanilang 2018 PBA Philippine Cup championship series noong Biyernes.
“Maybe that’s the reason we lost this game. I’m trying my best to give the the bench playing time,” sabi ni Austria. “We’re leading pero nahahabol na kami so I brought back the starters.”
Inaasahang babawian ng Beermen ang Hotshots sa Game Two ngayong alas-6:30 ng gabi sa Mall of Asia Arena sa Pasay City.
“The good thing it’s a championship. They have to beat us four times before they will be declared as champions,” ani Austria.
Sa naturang panalo ng Magnolia sa series opener ay itinabla ni Paul Lee ang laro sa 97-97 sa huling 3:27 minuto ng final canto mula sa 52-72 pagkakabaon, habang isinalpak ni Ian Sangalang ang dalawang mahalagang free throws sa huling 15 segundo para sa kumpletuhin ang kanilang come-from-behind win sa San Miguel.
“I told the guys we would need to limit them to 20 per quarter in the second half, and were able to do it on team effort,” ani Magnolia mentor Chito Victolero. “Hopefully, ma-sustain namin in the next game.”
Kumolekta ang 6’7 na si Sangalang ng 29 points, 9 rebounds, 2 steals at 1 assist para pamunuan ang Magnolia, samantalang umiskor ng pinagsamang 98 points sina starters four-time PBA MVP June Mar Fajardo (31), Alex Cabagnot (27), Marcio Lassiter (21) at Arwind Santos (19) para sa San Miguel (RCadayona)
- Latest
