Kai Sotto babandera sa Batang Gilas

MANILA, Philippines — Babanderahan ni big man Kai Sotto ang Phi-lippine youth team na sasabak sa darating na FIBA U16 Asian Championships sa Foshan, China sa Abril 2-8.

Ang 15-anyos na si Sotto, iginiya ang Ateneo sa UAAP juniors basketball championship, ang magsisilbing centerpiece ng 12-man team ni coach Michael Oliver.

Makakasama ni Sotto sa national youth team sina Rafael Go, Raven Cortez, McLaude Guadana, Terrence Fortea, Recaredo Christian Ca-limag, Rence Padrigao at Shaun Geofrrey Chiu na bumuo sa Batang Gilas squad na nagkampeon sa nakaraang Southeast Asian Basketball Association (SEABA) juniors championship sa Smart Araneta Coliseum noong nakaraang taon.

“We have a combination of height and speed. At least hindi na tayo kawawa sa ilalim unlike before. Hindi na tayo undersized sa mga kalaban natin,” wika ni Oliver kahapon sa Philippine Sportswriters Association (PSA) Forum sa Tapa King Restaurant sa Farmers Center sa Cubao.

Ang mga bagito naman sa koponan ay sina Jerick Kyle Bautista, Joshua Rafael Lazaro, Yukien Andrada at King Balaga.

Nakasama ni Oliver sa nasabing sports program sina Samahang Basketbol ng Pilipinas (SBP) executive director Sonny Barrios at Batang Gilas co-team mana-gers na sina Andrew Teh at Wilbert Loa.

Si Sotto ang pianakamatangkad na miyembro ng Batang Gilas sa kanyang taas na 7-foot-1 kasunod ang 6’8 at 6’7 na sina Chiu at Cortez, ayon sa pagkakasunod.

Kasama ng Batang Gilas sa Group B ang Australia at Malaysia, habang nasa Group A ang China, New Zealand at Hong Kong.

Ang Group C ay binubuo naman ng Iran, Chinese Taipei at Macau, samantalang nasa Group D ang Korea, Japan, Lebanon at India.

Ang top four teams matapos ang torneo ang kakatawan sa Asya para sa FIBA U17 Basketball World Cup sa Argentina sa susunod na taon.

Sa tournament format, ang best placed team sa bawat grupo ay didiretso sa knockout stage at ang second at third place teams ay sasabak sa playoff round.

“Naghahabol talaga kami sa training. Daily practices kami as much as possible,” wika ni Oliver.