DLSU tumatag sa liderato

MANILA, Philippines — Bumalikwas ang defending women’s champion La Salle mula sa 1-2 set na pagkakaiwan upang maigupo ang Far Eastern University, 25-17, 21-25,16-25, 25-20,15-5 kahapon para tumatag sa kanilang pangingibabaw sa UAAP Season 80 volleyball tournament sa Filoil Flying V Center sa San Juan.

Matapos itabla ang laban sa fourth frame, ma-lakas na sinimulan ng Lady Spikers ang decider, 5-0 at hindi na lumingon tungo sa kanilang pag-angat sa 8-2 kartada.

Lumutang ang championship poise ng Lady Spikers sa pangunguna nina Desiree Cheng at Majoy Baron na dinagdagan pa ng agresibong si Julia Ipac upang ibaba ang Lady Tamaraws sa 6-4 panalo-talo.

Sa naunang women’s game, nakabawi ang Adamson University sa kanilang first round tormentor na University of the East matapos ungusan ang 19-25, 25-11, 16-25, 25-16, 15-12 panalo.

Bunga nito, nakaahon ang Lady Falcons mula sa dalawang sunod na pagkatalo at pinalakas ang kanilang Final Four bid sa pag-angat sa markang 4-5, panalo-talo. Kasabay nito, pinutol din nila ang dalawang sunod na panalo ng UE na bumagsak 2-7 .

Sa men’s division, ginaping muli ng National University ang De La Salle University, 26-24, 19-25, 25-20, 28-26 upang maangkin ang unang men’s Final Four slot .

Namuno uli si Bryan Bagunas sa naturang panalo na nagsulong sa Bulldogs sa kanilang ika-anim na sunod na semifinals appearance matapos magtala ng 28-puntos kabilang ang 15 hits at 2 aces.

Ang panalo ang ika-9 ng Bulldogs at ikawalo nilang sunod sa loob ng sampung laro na nagpatibay ng kanilang hawak sa solong pamumuno.

Sa sumunod na laro, pinutol ng University of Sto. Tomas ang kanilang 5-game losing skid matapos padapain ang University of the East, 22-25, 27-25, 25-8, 25-9. FML