NU sasalo sa liderato
MANILA, Philippines — Ang muling makasalo sa pamumuno ang susubukan ng National University na makuha sa pagsagupa sa Ateneo de Manila University sa pagtiklop ng second round ng UAAP Season 80 volleyball tournament sa Filoil Flying V Center sa San Juan.
Pupuntiryahin ng Lady Bulldogs na makasosyo sa liderato sa pakikipagharap sa Blue Eagles ngayong alas-4 ngayong hapon.
Sa unang laro sa alas-2 ay magtatagpo naman ang University of the Philippines at University of Santo Tomas.
Magsisikap ang Lady Bulldogs na makabalik sa win column matapos ang natamong straight sets loss sa kamay ng Lady Spikers sa pagbubukas ng second round.
Nauna nang tinalo ng Lady Bulldogs ang Lady Eagles sa first round.
Ngunit hindi ito magiging madali para sa NU dahil galing sa panalo ang Ateneo laban sa FEU.
Habang nasa recovery period mula sa operasyon ang kanilang rookie libero na si Dani Ravena ay may nakitang pamalit si Thai head coach Tai Bundit sa katauhan ni Ponggay Gaston.
Sa unang laro, pipilitin naman ng Tigresses na makabangon mula sa five-game losing skid na nagbaon sa kanila sa ilalim ng team standings.
Dahil sa pagkadismaya sa kanilang kampanya ay naiyak si UST top hitter Sisi Rondina sa huli nilang pagkatalo.
Hangad naman ng UP na makabawi mula sa straight sets loss sa La Salle para patuloy na buhayin ang tsansang makaabante sa Final Four.
Sa men’s division, hangad naman ng defending champion na Ateneo na makamit ang pang-siyam na sunod na panalo kasama ang pagsikwat sa unang Final Four berth sa pagharap sa FEU sa alas-10 ng umaga makaraan ang sagupaan ng Adamson at UP sa alas-8 ng umaga. FMLumba
- Latest