Panakip-butas sa kalungkutan

Dear Vanezza,

Ako po si Jed na naaawa sa naglalasing kong kaibigan na babae dahil sa sama ng loob. Nakita niya ang bf niya na may kasamang ibang girl. Mahal na mahal daw niya ang bf niya. Naging magkaibigan kami. Lagi ka­ming namamasyal hanggang sa naging kami. Pero isang araw nag-text siya. Pasensiya na raw dahil napatunayan niyang mahal pa niya ang bf niya kaya nagkabalikan sila. Ang sama ng loob ko. Pero wala akong magawa. Hindi ko naman siya puwedeng pilitin na mahalin ako kung may iba nang nagmamay-ari ng kanyang puso. Ngunit nahihirapan ako. Ano ba ang gagawin ko? - Jed

Dear Jed,

Talagang mahiwaga ang pag-ibig. Kahit saktan pa ang isang babae kung talagang mahal niya ang lalaki pilit na ipinipikit ang mata sa katotohanang kahit niloko na siya ay siya pa rin ang mahal niya. Kalimutan mo na siya at huwag padadaig sa sama ng loob. Aral na iyan sa’yo. Kung ang isang babae ay mayroon nang nagmamay-ari ng puso, huwag nang tangkain pang ibigin. Magiging panakip-butas ka lang.

Sumasaiyo,
Vanezza