Pangalawang Anino (477)
“Mag-enjoy lang ho kayo rito sa banal na bundok. Nakikita ko ho na masaya kayo rito.”
“Oo, Nanette. Hindi ko alam kung paano pero napagbago kami ng banal na bundok. Sana ganito na lang palagi. At pati si Yawan, sana makatulad namin.”
“Hindi ho talaga madali, Aling Alona. Pero basta lumaban tayo sa kasamaan, magpapakatatag tayo sa tukso, magiging atin din ho ang kaligayahan at kapanatagan.”
“Hihintayin na lang namin na magigising si Nanette. At kapag nakita niya kaming masaya siguro ay maaayos na rin siya.”
“Opo. Sige po, aalis na po kami ni Arturo.”
“Ahm, Nanette, kumusta na nga pala si Roger?”
“Mabuti po. Nagkakabalikan na po sila ng Inay Sheila ko. Sana po okay lang sa inyo ‘yon.”
Ngumiti nang maaliwalas si Alona. “Okay lang. Kaya nga ako nagtanong ay para malaman ko kung bumalik ba siya sa talagang asawa niya. Dahil para sa akin, mas maluwag ang dibdib ko kapag ganoon ang nangyari. Sinira ko sila. Gusto kong mabuo kayo uli.”
Naluha si Nanette. “Salamat po, Aling Alona. Sige po, aalis na kami.”
At inangat sa lupa ng isang puwersa sina Nanette at Arturo na kapit-kamay. Dahan-dahan, isang vision na maka-Diyos.
Nakatingala sina Alona at Yawanaya.
“Mahal pa rin nila ang isa’t isa, Inay.”
“Oo. Pero nararamdaman ko na basta sa kaligayahan ni Yawan, handang magparaya si Nanette. Iyon nga lang, ang puso ni Arturo ay hindi naman puwedeng diktahan.”
NAKIKITA nina hari ng mga demonyo at Tagapag-alaga ang nangyayari sa bundok na banal.
“Hindi ko mapaniwalaang ganyan na kabait si Alona at si Yawanaya, panginoon.”
“Pumapabor nga sa kanila ang timbangan. At iyan si Yawan, posibleng pag nagising ay mapapayakap din sa nangyayari ngayon kina Alona at Yawanaya. Kaya kailangang kumilos na tayo kay Angela. Kapag hindi nagiging sakop natin si Angela at gising na si Yawan at nasa mabuti na ring puwersa, lalo akong manlalata. Talong-talo na tayo!”
“Pero puwede naman tayong humila sa kasamaan ng ibang tao o pamilya, panginoon?”
“Dito sa pamilyang ito nagsisimula ang laban, dito rin dapat matapos.” Itutuloy
- Latest