Maja, babu na sa pamilya

Lalabas na sa ibang network si Maja Salvador. Wala nga lang siyang tinukoy kung saang network siya mapapanood base sa latest post sa Instagram account.

“Ako po ay taos pusong  nagpapasalamat sa mga taong walang sawang sumusuporta sa akin at sa ABS-CBN.

“Mga kapamilya, sasamahan ko po muna ang aking tatay na si MR. M. kaya sana wag po kayong magugulat kung makikita nyo akong lumabas sa ibang network at patuloy na makapagbigay ng ligaya sa inyo kahit sa anong paraan at plataporma.

“Sana po ay tuloy tuloy niyo akong samahan at suportahan sa kahit na anong landas na aking tatahakin. Maraming salamat po,” saad ni Maja.

Pinusuan nina Kim Chiu, Julia Barretto, Rayver Cruz, Erich Gonzales at iba pang celebrities pati ang boyfriend niyang si Rambo Nuñez ang post ni Maja.

Sa pagkakaalam namin, may mga sinusuportahan din si Maja kaya kailangan din niyang kumayod para kumita, huh!

Identified sa kasalukuyan si Mr. M sa Brightlight Productions ni former Congressman Albee Benitez na blocktimer ng TV5.