Mopakatap og fake news bahin sa COVID-19 patient pamultahon
CEBU, Philippines — Gitinguha karon sa kagamhanan sa Dakbayan sa Mandaue nga pahamtangan og silot ang magpakatap og fake news kalabot sa estado sa usa ka tawo nga nagpositibo sa coronavirus disease.
Ang pagpahamtang og silot maoy unod sa ordinansahon nga gipangamahanan ni Konsehal Carmelino Delmar Jr nga gituki sa regular session sa konseho niadtong miaging adlaw.
Nalatid sa maong ordinansahon nga ang mapamatud-an nga nagpasiugda sa pagpakatap og fake news pinaagi sa pagtabi ngadto sa mga higala o silingan , makabayad og multa nga P5,000 ug ingon man manduan sa paghimo og community service.
Giduso na ngadto sa community on laws sa konseho sa maong dakbayan ang maong ordinansahon alang sa pagtuon ug amendment nga pagahimoon niini.
Si Konsehal Delmar mipasabot nga dili gayod makiangayon ang pagpakatap og sayop nga taho sa kahimtang sa tawo nga gitakboyan og COVID 19 maoy hinungdan nga ang pagpahamtang og silot maoy magsilbi nga tugbang sa mahimo unyang kalapasan.
Gipaabot nga hingpit nga aprobahan ang maong ordinansahon sa sunod nga regular session sa konseho sa Dakbayan sa Mandaue nga pagahimoon sa sunod semana. /MEL (BANATNEWS)
- Latest