Usec Vega nakigtagbo sa mga nagdumala og tambalanan
CEBU, Philippines — Niabot nganhi sa Sugbo kagahapon si Undersecretary Leopoldo “Bong” Vega sa Department of Health (DOH) alang sa meeting nga gipahigayon tali sa mga nagdumala og pribado ug pampublikong tambalanan.
Matud ni Vega nga nagtagbo sila kauban ang mga nagdumala sa pribado ug pampublikong tambalanan aron adunay close coordination ug masayran usab ang mga kakulangan sa tambalanan lakip ang pagtubag sa problema sa gubat batok sa covid-19.
Gibutyag ni Vega nga sa maong tigom gitinguha nila nga kapanaminan ang mga nahimong lapso sa niagi ug dili na kini mausab aron adunay kalamposan uban sa pagtinabangay tanan. Si Vega nagkanayon angayan usab nga ang mga tambalanan modugang og mga bed capacity alang sa covid-19 tungod kay dili man karon normal nga panahon.
Ug angay usab ang mga treatment facility sa mga hospital aron siguradong aduna dayon kini dali nga makatubag kong adunay mga panginahanglanon ang pasyente. Kini ang lakip sa gitutokan sa maong pakigtagbo ni Vega sa mga nagdumala og tambalanan aron adunay klaro ug tukma nga referral system nga mahimong dalhan sa mga pasyente sa covid-19 aron dili na sila maglisod pagpangita asa sila magpatambal.
Suroyon usab ni Vega ang mga tambalanan ilabi na ang pampubliko atol sa iyang pagbisita dinhi sa Sugbo. /BDB (BANATNEWS)
- Latest
