Annabelle na-shock sa pa-tseke ni Ruffa

Kahapon lang nag-post sa kanyang Facebook account (pati sa Twitter) ng birthday greetings si Annabelle Rama para sa anak na si Ruffa Gutierrez. One day late ‘yon at kagigising lang ni Ruffa kahapon nang tanungin ko siya kung nabasa ba niya ang FB post ng kanyang mother dearest?

“What, may Facebook si Mommy? Wala akong alam. Paano kong mababasa, hindi naman kami friends sa Facebook. I’m so clueless. Hindi naman kasi ako masyadong active sa Facebook, kaya wala talaga akong alam!” sabi ni Ruffa.

Nabanggit ko rin sa kanya na pati ang tatay niyang si Eddie Gutierrez, may FB account din. “I didn’t know. Hahaha!” natatawang dialogue niya at nagpaalam muna dahil may tawag daw siya sa kabilang linya.

Anyway, Ateng Salve, posting here ng message ni Bisaya for Ruffa, medyo inayos ko lang ng kaunti. “Happy birthday to my one and only daughter Ruffa. Sorry that Alexa & I didn’t go to your place to celebrate with you last night. I just saw it in your Instagram.

“Busy day for me yesterday. Hope you understand kung nasaan ako. Take care of your health. Don’t forget to have check-up every year, katulad ka rin sa akin na takot sa doctor and injection. Take care of Lorin and Venice. I-prioritize mo silang dalawa sa buhay. Give them all your love. Not other people sa buhay mo.

“Everytime we talk, lagi tayong nag-aaway. You know the reason why. You and our family, palagi kong pinagdadasal. Kasama kayo lagi sa prayers ko. Kaya ang tagal ko sa harap ang altar.  I know you love me. I feel it and I can see it. This difficult times na-prove ko lahat. You sending food every Sunday and thank you so much for the turmeric juices and most of all, for your generosity.

“Sinagot mo lahat ang expenses ng treatments ko even though I didn’t ask you, Richard and Raymond for help. I was so shocked the night before I left. Dumating ‘yung P.A. mo, 9:00p.m. may dalang check from you. Super shocked dahil magkaaway tayo that time. We did not talk.

“I understand, wala tayong trabaho lahat. Lumabas pa rin ang pera mo. You touched your savings for me. Alam kong never mong ginalaw ang savings for your kids. Kaya sobrang touch. I didn’t expect anything from you.

“But anyway nagmana ka rin sa daddy mo, malambot ang puso at hindi nagtatanim ng galit kaya ka sinisuwerte. Hindi katulad ko sinusumpa ang kaaway,” ang mahabang message ni Bisaya sa anak.

After 30 minutes, nag-usap uli kami ni Ruffa. “So, ano ang reaction mo sa post ng mommy mo?” tanong ko. “I cried! Nakaka-touch!” sabi niya.

Actually, ‘yung sinabi ni Bisaya na si Ruffa ang gumastos sa pagpapa-check-up niya ay naikuwento rin sa akin ng Gutierrez matriarch some weeks back. Pinagmalaki niya sa akin na sobrang touched siya kay Ruffa.

Napag-usapan na rin namin ‘yon ni Ruffa noong mabanggit sa akin ni Bisaya. “Bidang-bida ka sa mommy mo. Ikaw raw ang nagbayad ng check-up niya. Lahat ng laboratory tests, ikaw raw ang gumastos!” sabi ko kay Ruffa.

 So touching, Ateng Salve!

‘Yun na!