Out na si Crawford kay Pacquiao
MANILA, Philippines — Bilang respeto ay iginagalang ni bagong World Boxing Organization welterweight king Terence Crawford ang desisyon ni Filipino boxing icon Manny Pacquiao na iwasan siya.
Sa isang panayam ng SiriusXM Boxing Radio ay sinabi ni Crawford (33-0-0, 24 KOs) na malaya si Pacquiao (59-7-2, 39 KOs) na sagupain ang sinuman niyang gustong labanan.
“Pacquiao earned the right to go out how he wants to go out. He had fought everybody there is to fight — when they was there to fight,” wika ng 30-anyos na American world three-division titlist sa 39-anyos na si Pacquiao.
Noong nakaraang Linggo ay tinalo ni Crawford si Jeff Horn (18-0-1, 12 KOs) via ninth-round TKO para agawin sa Australian fighter ang hawak nitong WBO welterweight crown.
Ang nasabing korona ay hinubad ni Horn kay Pacquiao mula sa isang unanimous decision win noong Hulyo ng 2017 sa Brisbane, Australia.
Sinabi ni Crawford na wala nang dapat pang patunayan ang Filipino world eight-division sa ibabaw ng boxing ring.
“He fought all the top names. Eight-division champion. He accomplished everything there is to do in the sport of boxing,” sabi ni Crawford, planong ilaban ni Bob Arum ng Top Rank Promotions kay dating Briton welterweight titlist Amir Khan (32-4-0, 20 KOs).
Nakatakdang hamunin ni Pacquiao si World Boxing Association welterweight ruler Lucas Matthysse (39-4-0, 36 KOs) sa Hulyo 15 sa Kuala Lumpur, Malaysia.
“So if he chooses to go out with some fights of his choice, he deserved that. He earned that right,” sabi ni Crawford kay Pacquiao, planong magretiro kung matatalo sa 35-anyos na si Matthysse.
- Latest
