Pacquiao giabisohan dili magpalabi og training
CEBU, Philippines — Si Pinoy ring star Manny Pacquiao gipahimangnoan sa iyang Canadian adviser Mike Koncz nga dili magpalabi og training alang sa giatngan niyang pagbalik og away karong Hulyo.
Gusto ni Pacquiao nga magbansay-bansay sud sa duha ka bulan ug tunga kon 10 ka semana alang sa umaabot niyang paghagit ni WBA welterweight champion Lucas Matthysse karong Hulyo 15 didto sa Kuala Lumpur, Malaysia.
Ning sayo pa, si Koncz miabiso ni Pacquiao nga dili palabihan ang iyang mga pagabuhaton sa iyang training camp kay tingali’g makadaut lamang kini kaniya.
Nakahinumdum si Koncz niadtong tungora nga gilaay si Pacquiao sa Amerika samtang nangandam sa ilang away ni De la Hoya niadtong Disyembre 2008 hinungdan nga misibat kini sa iyang training camp.
Si Koncz midugang nga sa edad ni Pacquiao, sakto na ang pito o walo ka semana nga training aron makuha niya ang labing maayong kondisyon sa iyang lawas.
Gawas niini, gusto sab ni Koncz nga menosan ni Pacquiao ang milya sa iyang pagdagan ug ingon man gidaghanon sa rounds sa iyang sparring sud sa gym. (BANAT NEWS)
- Latest
