Alden sabit sa paglayas ni Super Tekla!

MANILA, Philippines — Ilang linggo nang hindi napapanood si Super Tekla sa Sunday Pinasaya! Tanggal na ba siya?

Ang kuwentong nakarating sa amin, hindi na raw kinuha ang komedyante pagkatapos mag-walk-out sa kanilang rehearsal.

Dagdag pang kuwento, duma­ting daw si Super Tekla sa studio para mag-rehearse pero inuna raw na pinag-rehearse si Alden Richards.

Medyo matagal daw ang rehearsal, at hindi raw nakapaghintay si Super Tekla, umalis na siya at hindi na bumalik.

Kinabukasan sa live show, hindi na raw sumipot si Super Tekla na walang pasabi. Kaya, hindi na raw kukunin si Super Tekla sa naturang programa.

Nilinaw namin ito sa isang taga-Sunday Pinasaya at sinabi niyang hindi naman daw talaga regular si Super Tekla sa naturang show. Guesting lang daw talaga siya roon, pero napapadalas nga lang. Agree naman dito ang handler ni Super Tekla na guesting lang siya talaga. Hindi lang daw napapanood lately doon ang komedyante dahil abala siya sa taping ng Inday Will Always Love You na kinunan pa sa Cebu.

Ngayon, heto ang kuwento sa amin ng handler ni Super Tekla tungkol sa kuwentong nag-walk out daw siya sa rehearsal dahil inuna sa pagri-rehearse si Alden. Text sa amin ni Rose Conde na siyang nagha-handle kay Super Tekla; “Hindi naman walk-out yun. Four to 5 hours na siya naghintay sa rehearsal.

“Nasa second floor, make-up room lang siya. Wala naman kumakausap sa kanila. Sama ng pakiramdam niya kasi Friday nag-taping pa ng Daig ng Lola. Bibe sila. Naka-costume tapos pawis na pawis. Ayun, kinabukasan nalamigan pa lalo sa make-up room kaya nagpaalam na sa akin na aalis na siya,

“Pinaalam ko kay Tita Carms (talent coordinator). Sama talaga ng pakiramdam, umuwi na.

“Hanggang kinabukasan, hindi ko na magising kasi nga tulog,  10AM nagsabi na ako kay Tita Carms na hangga’t maaga sabihan na ang production.”

Pakiusap lang sa amin ng kampo ni Super Tekla, huwag na sanang palakihin dahil wala naman daw talagang isyu.