P500 ayuda sa mahihirap simula ngayong araw
MANILA, Philippines — Simula ngayong araw ay matatangap na ng ilang mga mahihirap na kababayan ang ipinangako na P500 ayuda ng pamahalaan bilang tugon sa tumataas na presyo ng bilihin sa bansa.
Ito ang ipinangako ni Department of Social Welfare and Development (DSWD) Secretary Erwin Tulfo na target na matatanggap ng 12.4 milyong Pilipinong benepisiyaryo sa ilalim ng Targeted Cash Transfer (TCT) Program umpisa ngayong araw.
Nabatid na ngayong Lunes ng umaga (July 4) ay sisimulan na ng ahensiya ang pagdeposito ng ayuda sa cash card ng mga benepisiyaryo na maaaring tumagal lamang ng lima hanggang anim na araw.
“Tumawag po sa akin nitong Sabado si Pangulong BBM para kumustahin kung kailan maibibigay ang ayuda ng mga tao, sabi ko sa Lunes ng umaga po Sir,” sabi ni Sec. Tulfo.
Inilabas ng Department of Budget and Management (DBM) noong Biyernes ang P6.2 bilyong pondo para sa buwanang ayuda ng mga Pilipinong kabilang sa tinatawag na “low-income families”.
Ang programa ay ipatutupad ng DSWD sa loob ng anim na buwan upang makatulong sa taumbayang naghihirap dahil sa mataas na presyo ng gasolina at mga bilihin. Ang mga benepisiyaryong makakatanggap ng ayuda ay binubuo ng 4 na milyong pamilya mula sa Pantawid Pamilyang Pilipino Program (4Ps); 6 na milyong non-4Ps na dating benepisiyaryo ng Unconditional Cash Transfer Program; at 2.4 pamilya na nasa ‘Listahan’ o poverty data ng DSWD.
Umapela si Tulfo sa mga benepisiyaryo na gamitin sa tama ang kanilang mga ayuda. Nagpaalala din siya na maaring maalis sa listahan ang mga benepisiyaryo na mahuhuling ginagamit lang sa ilegal gaya ng pagsusugal ang kanilang mga ayuda.
- Latest
