Term extension bill sa presidente, bise inihain sa kamara
MANILA, Philippines — Isang araw matapos ang inagurasyon ni Pangulong Bongbong Marcos, isang panukala ang inihain kahapon sa House of Representatives na nagsusulong na gawing 5 taon ang unang termino ng Pangulo ng bansa at magkaroon ng reelection.
Ang panukala ay inihain ni Pampanga Rep. Aurelio Gonzales Jr.,at ipinaliwanag na ang 31M at 32M boto na nakuha ni Pangulong Marcos at Vice President Sara Duterte ay malinaw na indikasyon na pagpayag na ng taumbayan para sa isang Charter Change.
Sa ilalim ng kasalukuyang 1987 Constitution ay isang termino lamang na 6 na taon maaaring magsilbi ang Pangulo ng bansa at walang reelection, subalit sa panukala ni Aurelio ay maaari ang reelection bagama’t binaba sa 5 taon ang termino.
Maliban sa pagkakaroon ng reelection ng Pangulo ng bansa, nakapaloob din sa inihaing panukala ni Gonzales na ang ihahalal na Pangulo at ikalawang pangulo ay dapat nakaanib sa iisang partido habang isinusulong din nito na baguhin ang termino ng mga senador, congressman at local officials.
- Latest
