Korap na government officials bigyan ng mag-asawang sampal, sikmuraan — Robin
MANILA, Philippines — Dapat na magbitiw na lamang sa puwesto sa ngalan na ng delicadeza ang mga opisyal ng gobyerno na iniimbestigahan.
Ito ang sinabi ni Senator-elect Robin Padilla, matapos hingan ng reaksyon tungkol sa intelligence report na nag-uugnay sa pangalan ng ilang opisyal ng Bureau of Customs (BOC) at Department of’ Agriculture (DA) na umano’y sangkot sa smuggling sa bansa.
Giit ni Padilla, dapat uso na sa Pilipinas ang pagbibitiw sa puwesto sa gobyerno kapag naimbestigahan ang isang opisyal para magkaroon ng delicadeza at hindi kapit tuko pa.
Anya, isa sa kanyang natutunan sa pag-aaral sa Development Academy of the Philippines (DAP) ay ‘accountability’ o ang pananagutan sa mga taong nagsisilbi sa gobyerno at hindi umano maaaring ‘sorry’ lamang dahil nanumpa sila sa harap ng Diyos at sa harap ng taumbayan na magsisilbi at poproteksyunan ang sambayanang Filipino.
Para kay Padilla, heinous crime ang ganitong kalokohan kaya dapat ay makatikim ang mga korap na opisyal ng gobyerno ng mag-asawang sampal at sikmuraan din.
Dapat din umanong mag-imbestiga ang Senate Blue Ribbon Committee tungkol sa isyu ng ilegal na pag-aangkat ng mga produktong agrikultura.
- Latest