‘No booster shot card, no entry’ sa Hunyo malabo na

MANILA, Philippines — Malabo na umanong maipatupad sa Hunyo ang isinusulong ng gobyerno na “no booster shot card, no entry” sa mga papasok sa mga “enclosed establishment” bilang pangontra sa pagtaas ng COVID-19.

Ito ang sinabi ni Presidential Adviser for Entrepreneurship Joey Concepcion at marami ang hindi pumapayag na gawing mandatory ang pagpapakita ng booster shot card dahil kakaunti lamang ang nagpapaturok at mababawasan ang mga papasok sa mga establisimyento.

“Well, give up na rin ako diyan kasi maraming hindi pumapayag diyan sa mga booster shots. Kasi nakikita nila kakaunti rin ang mga taong kumuha ng booster shots, so halos walang papasok diyan sa mga business establishments,” pag-amin ni Concepcion.

Pero, ipinaalala ni Concepcion na nababawasan na ang bisa ng primary vaccines base na rin sa kanyang naging karanasan matapos kumuha ng antibody test.

Bagaman at naging “over confident” na aniya ang mga Filipino dahil mahina na ang nai-infect pero nakakaalarma ang posibleng pagtaas muli ng kaso ng COVID-19.

Ayon pa kay Concepcion marami naman ang bakuna sa bansa at mas mabuti nang magamit ito at maiturok kaysa manatili sa mga cold storage at masayang lang.

“So, I am appealing to our citizens na, if you really want to save the Philippine economy and protect lives of people, kunin na natin iyong booster. Kailangan rin natin iyan,” dagdag ni Concepcion.