Arawang kaso ng COVID-19 sa Metro Manila, tumaas
MANILA, Philippines — Inihayag kahapon ng OCTA Research na tumaas ng 19 porsyento ang arawang kaso ng COVID-19 sa Metro Manila sa nakalipas na halos dalawang linggo matapos ang halalan.
Subalit, ayon sa OCTA na nananatili namang nasa “low risk” ang Metro Manila sa kabila ng naitalang pagtaas sa 71 arawang kaso mula Mayo 13-Mayo 19 mula sa dating 59 ng sinundang linggo.
Tumaas rin ang reproduction number ng NCR sa 0.90 mula sa dating 0.76. Ikinukunsidera itong “moderate” mula sa dating “low classification”.
Nananatili naman ang positivity rate sa 1.2% ng ikinakasang 11,476 average na Covid tests kada araw. Ang hospital rate naman ay nasa 22% sa rehiyon.
Umakyat rin ang isang linggong average daily attack rate (ADAR) sa 0.50 mula sa dating 0.42. pero ito ay “very low risk”.
Kaya’t patuloy ang panawagan ng Department of Health sa publiko na hindi pa bakunado na magpabakuna na at sa mga nabakunahan ay magpa-booster shot dahil sa bumababang immunity upang maiwasan ang mga Omicron variants.
- Latest
