BSP nagtaas ng ‘interest rates’

MANILA, Philippines — Upang masolusyunan ang mabilis na ‘inflation rate’ sa bansa dahil sa paghina ng ekonomiya nitong pandemya ay itinaas ng Bangko Sentral ng Pilipinas ang kanilang ‘benchmark rate’ sa maraming uri ng transaksyong pinansyal sa 2.25 porsyento.

Ang ‘benchmark rates’ ay ang regular na ina-update na ‘interest rates’ na ginagamit sa iba’t ibang pinansyal na kontrata tulad ng pagsanla, ‘bank overdraft’ at iba pang kumplikadong prosesong pinansyal.

Ayon sa BSP, sinundan rin nila ang ginagawa ng ibang central bank sa buong mundo sa pagtataas ng interest rates habang unti-unting bumabangon ang ekonomiya mula sa resesyon dahil sa pandemya.

Lumago ang ekonomiya ng Pilipinas ng 8.3% ngayong unang quarter ng taon, pero tumaas rin ang inflation rate ng 4.9% nitong Abril, na mas mataas sa prediksyon ng pamahalaan na 2-4% na pangunahing tumaas ang presyo ng langis at pagkain.

Sinabi ni BSP Governor Benjamin Diokno na ipatutupad ang polisiya sa interest rate sa ikalawang bahagi ng taon. Ito ang kauna-unahang ‘rate hike’ ng bansa sa loob ng tatlong taon.

Naniniwala ang BSP na magpapatuloy ang pagtaas ng ‘inflation’ dahil sa epekto naman ng nagpapatuloy na digmaan sa Ukraine, normalisasyon ng mga polisiya ng US Federal Reserve at mga problema sa suplay ng mga produkto sa mundo na nagtutulak sa mas mataas na presyo.