3 magkamag-anak niratrat sa bahay, patay

MANILA, Philippines — Patay ang tatlong magkamag-anak habang lima ang ­nasugatan nang pagbabarilin ang kanilang bahay ng mga hindi pa kilalang suspek sa Brgy. Capaculan, Milagros, Masbate, kamakalawa ng gabi.

Kinilala ang mga nasawi na sina Benjie Padalhin Cataga; Jonel Dematillo Yerona; at Jeddah Raven Rosero Dizon habang sugatan sina Juanito Dumagit Cataga, Artemio Etcubanes Cataga, Michille Padalhin Cataga, Niño Cataga Rosero at Felomino Dizon, kapwa residente ng naturang barangay.

Sa ulat, alas-9:20 ng gabi habang nasa loob ng kanilang bahay ang mga biktima nang mula sa labas ay pinagbabaril sila ng mga hindi pa kilalang suspek na mabilis na tumakas.

Agad naman sinaklolohan ng mga kaanak at kapitbahay ang mga biktima na isinugod sa Masbate Provincial Hospital sa Masbate City pero hindi na umabot ng buhay ang tatlo.

Patuloy ang ginagawang imbestigasyon ng pulisya sa motibo sa pamamaslang ng hindi pa kilalang mga suspek.