Kaso ng Omicron kalat na sa 15 lugar sa Metro Manila - DOH
MANILA, Philippines — Labinlimang lugar sa Metro Manila ang nakapagtala na ng kaso ng Omicron variant ng COVID-19. base sa resulta ng ‘genome sequencing’ ng Department of Health (DOH).
Hindi naman tinukoy ni DOH Epidemiology Bureau director Dr. Alethea de Guzman ang mga partikular na lugar na nakitaan ng Omicron cases na kaniya nang tinukoy na ‘dominant variant’ na sa Metro Manila.
“Our latest whole genome sequencing showed that the Omicron variant is now the predominant variant in the National Capital Region,” ayon kay De Guzman.
Bukod sa 15 sa 17 lugar sa Metro Manila, natukoy na rin ang Omicron sa 13 sa 17 rehiyon sa bansa.
Masasabi umano ngayon na ang pagtaas ng mga kaso ng COVID-19 sa bansa ay dulot ng mas nakakahawang Omicron variant, ayon pa kay De Guzman.
Unang sinabi ni Health Secretary Francisco Duque III na binubuo na ng Omicron variant ang 90% ng resulta ng kanilang genome sequencing.
Mas nakatulong pa umano sa pagtaas ng mga kaso ang mas malayang paggalaw ng publiko, pagluluwag sa pagsunod sa ‘health protocols’, at maging pagkaantala sa pagtukoy at agarang paghiwalay sa mga pasyenteng naimpeksyon.
Una nang sinabi ni Health Undersecretary Maria Rosario Vergeire na mayroon nang ‘community transmission’ ng Omicron variant sa NCR at nakikita na nagkakaroon na rin ng parehong sitwasyon sa Region IV-A, Region II, CAR, Region VI, VII at V.
- Latest
