Magnanay nakuryente, patay

MANILA, Philippines — Hindi na umabot ng buhay sa ospital ang mag-ina matapos na sila ay makuryente sa nakabiting kable sa Purok-6, Brgy. Balaba, Polangui, Albay, kamakalawa ng gabi.

Ang mag-inang nasawi ay kinilalang sina Lea Viola Regala, 34; at anak na si Ejay, 11, pawang residente ng naturang lugar. Sa salaysay ng isang Lanie Llaneta sa mga pulis ay nakita niya ang mag-ina, alas-6:00 ng gabi na nagtungo sa kalapit na batis para maligo.

Ilang sandali ay narinig nito ang palahaw ng mag-ina kaya agad niya itong pinuntahan at inabutan pang nakahandusay at nanginginig ang dalawa sa damuhan habang nakadikit sa putol na kable ng kuryente.

Mabilis na sinaklolohan ang mga biktima ng mga kapitbahay at isinugod sa pinakamalapit na pagamutan, subalit hindi na umabot nang buhay.

Pinaniniwalaang unang nakuryente ay ang batang si Ejay nang madikit sa nakalambiting putol na kable mula sa poste na sinaklolohan ng ina kaya’t pareho silang nakuryente